Научници открија нов механизам преку кој кафето потенцијално придонесува за подобро здравје и подолг живот, а според најновото истражување, кофеинот има многу помала улога отколку што досега се мислеше.
Студијата на Универзитетот Texas A&M покажала дека главниот ефект против стареење најверојатно доаѓа од растителните соединенија во зрното кафе, а не од кофеинот. Истражувањето е објавено во научното списание Nutrients.
Научниците анализирале како соединенијата од кафето влијаат врз рецепторот NR4A1, протеин кој ја регулира активноста на гените како одговор на биолошки стрес. Според биохемичарот Стивен Сејф, овој рецептор има важна улога во заштитата на телото од оштетувања и воспаленија.
Истражувањето покажало дека одредени соединенија од кафето се врзуваат за рецепторот NR4A1 и можат да го намалат растот на клетките на рак, како и воспалителните процеси во организмот. Кога рецепторот бил отстранет од клетките, овие ефекти исчезнале, што дополнително ја потврдило неговата улога.
Иако кофеинот исто така се врзува за рецепторот, научниците утврдиле дека неговото дејство е значително послабо во споредба со полифенолните и другите растителни соединенија во кафето.
Кафето содржи повеќе од 1.000 различни хемиски состојки, меѓу кои и хлорогенска и кофеинска киселина, што го прави исклучително сложен напиток. Научниците предупредуваат дека се потребни дополнителни истражувања за целосно да се разбере како овие соединенија дејствуваат во човечкото тело.
И покрај позитивните резултати, истражувачите нагласуваат дека кафето е само дел од здравата исхрана и дека корисните растителни соединенија можат да се внесуваат и преку овошје и зеленчук.
