Наунов за судењето за „Пулс“: Дали овој судски процес ќе заврши со однапред договорен исход, позадински влијанија и прикривање на вистината?

Пред Основниот суд во Кочани, Александар Наунов, татко на загинатата Надица Наунова во трагедијата во дискотеката „Пулс“, одржа емотивен говор во кој изрази длабоко разочарување од текот на судската постапка и начинот на кој се одвивало последното рочиште.

— реклама —

Тој истакна дека наместо доказите да бидат внимателно презентирани и разгледани, во судницата владеел неред, при што, според него, на одбраната ѝ било дозволено гласно да реагира по секој презентиран доказ. Како што рече, со поднесување барање за изземање на обвинителката Наташа Сарамандова било овозможено нејзино привремено отстранување од предметот до донесување одлука по барањето.

„Како ќе се утврди вистината ако не се прикажат доказите? Дали со нивното презентирање на обвинетите им станува јасно што сè направиле или не направиле за да дојде до оваа трагедија?“, праша Наунов.

— реклама —

Тој оцени дека Судот не презел мерки за воспоставување ред во судницата, а наместо тоа, укор бил упатен кон оштетените кои, како што рече, со напуштањето на судницата сакале да ѝ дадат поддршка на обвинителката Сарамандова во нејзините напори за целосно расветлување на случајот.

— реклама —

Наунов упати прашања дали постојат институции што ќе обезбедат правилен тек на судењето и дали постои опасност процесот да заврши под влијание на, како што наведе, однапред договорени исходи и прикривање на вистината. Тој посочи дека доколку биде потребно, ќе побараат вклучување и на меѓународни институции, вклучително и Судот во Стразбур.

„Ние ги изгубивме нашите деца и нема да дозволиме вниманието да се оттурне од процесот. Ќе ја следиме секоја неправда и ќе се бориме до последен момент за вистината“, порача Наунов.

Во своето обраќање тој изнесе и став дека од досегашниот тек на судењето се стекнува впечаток оти обвинетите службеници од Министерството за економија можеле да издадат лиценца за кабаре без соодветна контрола и без да ги согледаат можните последици, кои, според обвинението, довеле до трагедијата во која загинаа десетици млади лица.