Поради можна инфекција со хантавирус, 12 вработени во болницата „Радбауд“ во холандскиот град Најмеген се ставени во карантин, откако не биле целосно испочитувани безбедносните протоколи, пренесуваат холандските медиуми.
Според „НЛ Тајмс“, вработените биле вклучени во третманот на пациент, патник од крузерот „Хондиус“, кој бил позитивен на хантавирус.
Во болницата не биле целосно почитувани строгите процедури при ракување со крв и урина од заразениот пациент.
Иако ризикот од инфекција се оценува како низок, од болницата соопштиле дека вработените, од претпазливост, ќе останат во карантин шест недели.
Не е објавено дали станува збор за лекари, медицински сестри, болничари, студенти по медицина или друг персонал.
Три лица досега починале од хантавирус по неодамнешната епидемија меѓу 147 патници и членови на екипажот на патничкиот брод што пловел под холандско знаме.
Две од жртвите се идентификувани како брачен пар од холандскиот регион Фризија, додека третата жртва е германска државјанка.
Досега најмалку седум лица биле позитивни на хантавирус, а за уште неколкумина постои сомнеж дека се носители на инфекцијата.
