„Не ни е првпат да губиме“ – Дачиќ го призна изборниот неуспех и најави реформи

Лидерот на Социјалистичката партија на Србија (СПС), Ивица Дачиќ, се обрати од изборниот штаб на партијата по објавувањето на прелиминарните резултати од парламентарните избори, според кои социјалистите не успеале да го поминат изборниот праг од три проценти. Дачиќ призна дека резултатот е разочарувачки, но порача дека партијата нема да исчезне од политичката сцена.

„Референдумската атмосфера не ни одеше во прилог. СПС со своите партнери не се обиде во таква атмосфера да заземе водечка позиција со својата листа. За жал, не успеавме да го постигнеме посакуваниот резултат“, изјави Дачиќ, пренесува српски „Телеграф“.

Тој оцени дека изборната трка се претворила во директно соочување меѓу двете најголеми листи, поради што за останатите политички опции речиси и да немало простор.

— реклама —

„Со месеци слушаме дека го губиме идентитетот и дека не постоиме. Сакам да им се заблагодарам на повеќе од 100.000 луѓе кои во вакви услови гласаа за нас, додека други политички партии не се осмелија ниту да се појават“, рече Дачиќ.

Според првичните процени, СПС освоила околу 2,3 проценти од гласовите, што би бил најслабиот парламентарен резултат на партијата од воведувањето на повеќепартискиот систем во Србија. На изборите во 2023 година социјалистите освоија 6,55 проценти и 18 пратенички мандати, додека во 2022 година имаа 11,44 проценти и 31 пратеник.

„Секако дека не сме задоволни. Им честитаме на оние што победија и освоија повеќе гласови од нас. Ќе продолжиме да се бориме за Србија. Имаме цврсти ставови и ја продолжуваме борбата. Не ни е првпат да губиме, но остануваме тука и одиме понатаму“, порача Дачиќ.

— реклама —

Тој најави анализа на изборниот резултат и внатрепартиски реформи, оценувајќи дека кризата треба да биде поттик за подобри резултати на следните претседателски и локални избори.

Дачиќ се осврна и на својата здравствена состојба, наведувајќи дека неколку месеци бил спречен активно да учествува во политичките активности, што, според неговата оценка, се одразило и врз изборниот резултат.

„Вложив максимален напор и покрај здравствената состојба, поради која неколку месеци бев надвор од строј. Не е лесно да се зборува за ова. Сè уште не го знаеме точниот резултат, но знаеме дека добивме повеќе од 100.000 гласови“, изјави тој.

— реклама —

И покрај изборниот неуспех, Дачиќ порача дека социјалистите ќе продолжат со политичкото дејствување.

„Сè додека остане барем еден социјалист, нема да исчезнеме“, нагласи лидерот на СПС.

Како актуелен министер за внатрешни работи, Дачиќ најави дека до завршувањето на мандатот ќе продолжи да се грижи за зачувувањето на јавниот ред и мир.

„Како министер за внатрешни работи, до крајот на мандатот ќе обезбедам сите државни органи да го зачуваат јавниот ред и мир. Функцијата ќе ја извршувам додека не се формира новата влада, а потоа ќе ѝ се посветам на партијата, сè до изборот на новото партиско раководство“, изјави Дачиќ.

Неговото обраќање заврши со пораката „Да живее Србија“.

Според последниот доставен пресек на Републичката изборна комисија, објавен во 23:20 часот, листата на Дачиќ имала 2,56 проценти од гласовите по обработени 2.456 од вкупно 8.392 избирачки места. И тој резултат е под изборниот праг, но конечната распределба на мандатите ќе биде позната по завршувањето на обработката на изборните резултати.