Во сабота, на 6 јуни, во Кочани ќе се одржи 45. „Марш на ангелите“, во организација на Здружението на граѓани „16-ти Март 2025“, формирано од семејствата на настраданите во трагедијата во дискотеката „Пулс“.
Маршот ќе започне во 18:05 часот од Паркот на Револуцијата во Кочани, а учесниците ќе се движат кон Трговскиот центар, УЈП, Полициската станица, Основниот суд и ќе завршат пред спортската сала „Кочански ангели“.
Од здружението порачуваат дека повторно ќе чекорат во спомен на 63-те загинати, за повредените и за семејствата кои, како што наведуваат, секојдневно живеат со последиците од трагедијата.
„Повторно ќе чекориме. Не затоа што времето ја намалува болката. Туку затоа што љубовта не престанува, а правдата не смее да чека“, наведуваат од Здружението.
Тие додаваат дека маршот е повик за одговорност и за целосно расветлување на трагедијата.
„Овој марш е за сеќавање. За одговорност. За вистината да не остане без глас и правдата да не остане без крај“, стои во повикот.
Семејствата и граѓаните и овојпат ќе маршираат под пораките: „Не забораваме“, „Не отстапуваме“ и „Продолжуваме“.
„Тишината не е заборав. Маршот е нашата сила“, порачуваат организаторите.
