Ограничувањата за продажба на гориво повторно се воведуваат на бензинските станици во Москва поради недостиг на бензин, предизвикан од украинските напади со дронови врз руските рафинерии, но и од зголемената сезонска побарувачка.
Проблемите со снабдувањето започнале во мај, а до јули се прошириле во поголем број руски региони. Во Москва ограничувањата во јуни накратко биле ублажени, но повторно се воведени по влошувањето на состојбата. На терен се забележани и долги редици пред бензинските станици во Москва и околината.
Украина со нападите врз руските рафинерии настојува да ги намали приходите на Москва од енергетскиот сектор и да ги отежне нејзините воени напори. Руските власти, од друга страна, преземаат мерки за зголемување на домашното снабдување, меѓу кои забрана за извоз на бензин и дизел, олеснување на одредени барања за квалитетот на горивото и увоз на нафтени деривати.
На автоматските бензински станици на „Газпром Нефт“ во Москва, продажбата на бензин и дизел е ограничена на 40 литри по купувач. На останатите станици на компанијата, за дизелот нема ограничување, додека бензинот е ограничен на 60 литри по возило.
„Роснефт“, најголемиот руски производител на нафта, соопшти дека на сите свои бензински станици во земјата продажбата на бензин е ограничена на 30 литри по возило, додека за дизелот нема ограничување. Компанијата предупреди и на подолги чекања поради зголемената побарувачка.
Ограничувања воведе и „Лукоил“ во Москва и околината, повикувајќи се на зголемена побарувачка, вонредно одржување на рафинериите и потребата да се обезбеди стабилно работење на бензинските станици. „Татнефт“ ја ограничи продажбата на бензин на 50 литри по возило.
