Некој тука лаже, АНБ веднаш да ја декласифицира документацијата за случајот со прислушувањето, бара СДСМ

СДСМ побара Агенцијата за национална безбедност (АНБ) без одлагање да ја изврши декласификацијата на целата документација поврзана со случајот што, како што велат, власта се обидува да го претстави како афера за прислушкување.

— реклама —

„Власта да не бега од вистината, АНБ веднаш да направи декласификација. Не е точно дека преку судска постапка треба да се декласифицираат документите, тоа е само алиби и параван зад кој се крие вистинската намера на власта. Законот е јасен – ‘тој што класифицира, тој и декласифицира’. Во овој случај тоа е АНБ и тоа треба да се направи веднаш“, соопштија од СДСМ.

— реклама —

Според партијата, недозволиво е во јавноста да се фрлаат обвинувања без факти и докази, бидејќи таквото однесување ја поткопува довербата во институциите и остава сомнеж за манипулација со политички мотиви.

— реклама —

„Како е можно премиерот Мицкоски да тврди дека бил прислушуван, а директорот на АНБ Христовски да кажува друго – дека станува збор за прибирање информации за таргетирани лица? Некој тука свесно лаже. Само преку декласификација јавноста ќе ја увиди реалноста и ќе се види дали и кој правел злоупотреби“, истакнаа од СДСМ.

— реклама —

Тие предупредија дека доколку не се направи декласификација, ќе се потврди дека целиот случај е креиран за партиски цели и политичка злоупотреба на ВМРО-ДПМНЕ.