Нема активни пожари во државата

Центарот за управување со кризи (ЦУК) информира дека во периодот од 21 до 22 септември, до 07:30 часот, на територијата на државата биле регистрирани вкупно 31 пожар на отворен простор.

Од нив, во утринските часови нема активни пожари, еден пожар е ставен под контрола, додека останатите 30 се изгаснати.

— реклама —

Пожарот што е под контрола е регистриран во атарот на село Белица, на местото викано Кајорец, во општина Македонски Брод, од каде што се проширил кон Јасен во општина Сопиште. Зафатена е нискостеблеста и мешана шума.

Во Скопскиот регион биле регистрирани пожари на повеќе локации. Во општина Гази Баба биле зафатени ниска шума и ниска вегетација на Раштански пат, како и ниска вегетација во Идризово и во Индустриската зона Илинден. Во Бутел биле регистрирани пожари во Раштак – Љуботен, каде горело ѓубре, и во Љубанци, каде била зафатена ниска вегетација.

— реклама —

Пожари биле регистрирани и во Чучер Сандево, Арачиново, Илинден, Кисела Вода, Ѓорче Петров и Шуто Оризари. Зафатени биле ниска вегетација, отпад, депонии и стрништа.

Во Штип пожарот бил регистриран во близина на Полициската станица, на влезот во градот, додека во Виница гореле ниска вегетација и слама во село Драгобрашта, во маалото Криворанци.

— реклама —

Во Кумановскиот регион биле регистрирани повеќе пожари, меѓу кои на местото Стари Лозја, во селата Речица и Черкезе, зад фабриката „Искра“ и на улицата „Октомвриска Револуција“. Гореле ниска вегетација, отпад и стрништа.

Пожари биле регистрирани и на подрачјата на Кратово и Старо Нагоричане, Желино, Врапчиште, Охрид, Кавадарци, Росоман, Велес, Струмица, Валандово и Липково.

Според информациите на ЦУК, меѓу локациите каде што биле изгаснати пожарите има и депонии, земјоделски површини, ниска вегетација, грмушки, стрништа и отпад.

Во моментов нема активни пожари на отворен простор, додека еден пожар останува под контрола.