Нема активни пожари во Македонија, под контрола пожарот кај Белица и Јасен

Вкупно 12 пожари на отворен простор се регистрирани во Македонија во периодот од 15 до 16 септември, до 07:30 часот, информира Центарот за управување со кризи (ЦУК).

Според информациите, во моментов нема активни пожари. Еден пожар е ставен под контрола, додека останатите 11 се целосно изгаснати.

— реклама —

Пожарот што е под контрола е на подрачјето на Општините Македонски Брод и Сопиште, кај селото Белица, во местото Кајорец, од каде што се проширил кон Јасен. Зафатени се нискостеблеста и мешана шума.

— реклама —

Во Општина Теарце бил регистриран пожар кај Нераште, каде што горело ѓубре, додека во Ерџелија, Општина Свети Николе, гореле ниска вегетација и ѓубре.

Во Општина Велес биле изгаснати пожари кај селата Раштани и Белештевица, со зафатена ниска вегетација. Пожар со ѓубре бил регистриран и на Кејот на Вардар во Општина Карпош.

— реклама —

Во Долно Свиларе, Општина Сарај, гореле ниска вегетација и мешана шума, додека во Трубарево, Општина Гази Баба, пожарот зафатил ниска вегетација и ѓубре.

Пожари биле изгаснати и во Десово, Општина Долнени, кај „Економијата“ на затворот во близина на Битола, во Агино Село, Општина Куманово, како и во Дељадровци и Мршевци, Општина Илинден. Во сите овие случаи горела ниска вегетација.

Уште еден пожар во Општина Гази Баба бил регистриран во Стајковци, каде што горела ниска вегетација.