Членката на Извршниот одбор на СДСМ, Наташа Поповиќ, на денешната прес-конференција обвини дека Владата предводена од ВМРО-ДПМНЕ ја довела во ризик стабилноста на пензискиот систем и ја загрозила исплатата на пензиите.
Според Поповиќ, државната каса се соочува со недостиг на средства, а состојбата во Фондот за пензиско и инвалидско осигурување дополнително се влошува.
„Дупката во ПИОМ се продлабочува и достигна речиси 40 проценти. Ова е резултат на расипничките политики на ВМРО и јасен доказ дека Владата нема решение за долгорочна стабилност на пензискиот систем“, изјави Поповиќ.
Таа се осврна и на изјавата на гувернерот на Народната банка, Трајко Славески, посочувајќи дека предупредувањата за состојбите во пензискиот систем претставуваат сериозен аларм.
Од СДСМ тврдат дека Владата, наместо да спроведува реформи, го доведува во прашање и вториот пензиски столб, кој, според нив, е клучен за обезбедување дополнителна пензиска сигурност за идните генерации.
„Парите во вториот столб се лични средства кои граѓаните ги издвојуваат со години. Негово укинување или слабеење би значело уште поголем притисок врз државниот пензиски фонд и дополнителна неизвесност за идните пензионери“, рече Поповиќ.
Таа оцени дека планираното зголемување на стапката на задолжителниот пензиски придонес претставува, како што рече, обид за пренасочување средства кон ПИОМ поради недостиг на пари во буџетот.
Поповиќ истакна дека јавниот долг расте, а буџетскиот дефицит, според СДСМ, веќе е значително потрошен.
„За две години Мицкоски и Владата не само што ја загрозија сигурноста на сегашните пензионери, туку ја доведоа во прашање и иднината на генерациите кои допрва треба да се пензионираат“, порача Поповиќ.
