СДСМ преку соопштение обвини дека Владата не ги исполнува обврските кон земјоделците и дека, според нив, државата им должи околу 70 милиони евра по различни основи.
Од партијата тврдат дека исплатата на субвенциите доцни со месеци, а дека земјоделците се соочуваат со неизвесност во период кога е во тек жетвата.
„Во екот на жетвата, земјоделците не знаат по која цена ќе ја продаваат пченицата. Откуп нема, откупувачи нема, а се шпекулира со понижувачка цена од само 10 денари за килограм“, наведуваат од СДСМ.
Според партијата, сточарите исто така се соочуваат со проблеми поради доцнењето на субвенциите и несигурниот пласман на млекото, при што тврдат дека дел од младите сточари веќе две години не добиле државна поддршка.
СДСМ оценува дека реконструкцијата на Владата нема да ги реши проблемите во земјоделството и упати критики кон новите кадровски решенија.
Од партијата побараа Владата итно да ги исплати сите заостанати субвенции, да обезбеди фер и загарантирани откупни цени за стратешките земјоделски производи и да преземе мерки за заштита на домашното производство.
„Македонските земјоделци заслужуваат сигурност, почит и навремена поддршка, а не неизвесност и долгови“, наведуваат од СДСМ.
