Нема социјални мрежи за деца под 15 години: Турција воведе и посебни правила за тинејџерите

Во Турција стапи на сила забраната за пристап до социјалните мрежи за деца помлади од 15 години.

Проверката на возраста за постојните кориснички сметки ќе продолжи до 31 март 2027 година, а во текот на преодниот период, управите на социјалните мрежи постепено ќе ги затвораат профилите на децата, пренесува „Анадолија“.

— реклама —

Турција во средината на октомври им забрани на давателите на услуги на социјалните мрежи да нудат услуги на малолетници помлади од 15 години, согласно новите прописи на Дирекцијата за сајбер-безбедност.

Во уредбата се наведува дека давателите на услуги „не можат да им нудат услуги на деца кои немаат наполнето 15 години“.

— реклама —

Покрај тоа, платформите мора да понудат различни видови услуги и да ги преземат неопходните мерки за корисниците постари од 15 години. Проверката на возраста треба да даде приоритет на заштитата на личните податоци, со користење методи што утврдуваат само дали корисникот го исполнува возрасниот услов, без да го откриваат неговиот идентитет.

— реклама —

За да пристапат до социјалните мрежи, корисниците ќе мора да поминат проверка на идентитетот преку владината платформа за електронски услуги е-Девлет.

По проверката, корисниците ќе добијат дигитален токен со информации за нивната возраст.

На лицата помлади од 15 години ќе им биде одбиен пристапот, додека тинејџерите на возраст од 15 до 18 години ќе можат да ги користат социјалните мрежи, но со одредени ограничувања.

Размената на пораки ќе биде можна само со профилите на пријателите, преносите во живо ќе бидат забранети, а корисниците нема да гледаат реклами наменети за возрасни.