Македонскиот кошаркарски репрезентативец Ненад Димитријевиќ и официјално е нов член на грчки Арис, откако клубот од Солун го потврди неговиот трансфер.
Димитријевиќ потпиша двегодишен договор и во новата сезона ќе работи под водство на легендарниот грчки кошаркар Василис Спанулис, кој летово ја презеде тренерската функција во Арис.
„Кошаркарскиот клуб Арис со задоволство објавува дека Ненад Димитријевиќ е нов член на нашиот тим во следните две години. Играчот доаѓа од рускиот Зенит од Санкт Петербург, со кого беше под договор“, соопшти грчкиот клуб.
Иако формално беше играч на Зенит, македонскиот плејмејкер минатата сезона ја мина како позајмен кошаркар во Баерн Минхен. Во Евролигата просечно бележеше 11 поени, 2,3 скока и 4,1 асистенција по натпревар.
Со неговото доаѓање, Арис добива едно од најголемите засилувања пред новата сезона, во која клубот ќе се обиде повторно да се наметне во врвот на грчката и европската кошарка.
