Четири лица се уапсени во поширокото подрачје на Бенковац поради сомнение дека се поврзани со подметнување пожари, соопшти Задарската полициска управа.
Полицијата реагирала откако граѓани во текот на синоќешната вечер, по 20 часот, пријавиле сомнително однесување. Полициските службеници набргу лоцирале и запреле возило во кое се наоѓале осомничените.
Сите четворица биле однесени во службените простории за криминалистичко истражување, со цел да се утврдат околностите околу нивното движење и евентуалната поврзаност со пожарите што избиле во областа на Задар.
Според неофицијални информации на хрватските медиуми, меѓу уапсените има тројца хрватски државјани и една странска државјанка. Наводно, брачен пар ги забележал во близина на Раштевиќ, недалеку од Бенковац, во моментот кога палеле оган, по што веднаш ја повикале полицијата.
Истражителите се сомневаат дека четворицата би можеле да се поврзат со неколку пожари што во изминатите денови избиле во ова подрачје.
Само вчера и во текот на ноќта пожарникарите интервенирале на повеќе пожари на отворен простор во областа на Бенковац, меѓу другото во Билјани, Лишани Тињски, Запужани, Заград, Добропољци, Биоград на Торови и Привлака. Благодарение на брзата интервенција, пожарите биле ставени под контрола.
Во Хрватска, за несовесно предизвикување пожар е предвидена парична казна од 260 до 1.990 евра, додека намерното предизвикување пожар може да се казни со глоба од 1.990 до 19.900 евра или со затвор до 60 дена. Доколку пожарот ги загрози човечките животи или предизвика значителна материјална штета, сторителот може да се соочи и со долгогодишна затворска казна до 15 години.
