Израелскиот премиер Бенјамин Нетанјаху му се заблагодари на словенечкиот премиер Јанез Јанша откако Словенија не ја поддржа заедничката изјава на Европската унија со која се осудуваат израелските планови за проширување на населбите на окупираниот Западен Брег.
Нетанјаху на социјалните мрежи го пофали потегот на Јанша и го обвини Брисел за двојни стандарди.
„Му благодарам на премиерот Јанша за храброста и јасноста во услови на лицемерството на ЕУ“, напиша Нетанјаху, додавајќи дека Словенија е суверена држава и рамноправна членка на Европската унија.
За заедничката изјава на ЕУ била потребна согласност од сите земји-членки. Словенија не дала согласност, поради што Европската служба за надворешно дејствување можела да објави само изјава на високата претставничка на ЕУ за надворешна политика, Каја Калас, а не заеднички став на сите 27 членки.
Со изјавата требало да се осуди одлуката на израелската влада да распише тендер за изградба на повеќе од 1.200 станови за израелски доселеници во рамките на проектот Е1.
Станува збор за стратешки важно подрачје источно од Ерусалим. Поширокиот план предвидува изградба на околу 3.400 станови, а критичарите предупредуваат дека неговата реализација би ја прекинала територијалната поврзаност на палестинските области.
Потегот на словенечката влада, предводена од Јанша, го критикуваше и словенечката претседателка Наташа Пирц Мусар. Таа порача дека Словенија треба да го поддржи заедничкиот став на ЕУ и доследно да го брани меѓународното право.
„Меѓународното право не е прашање на политички избор и при неговото почитување не смее да има двојни стандарди. Тоа важи за сите“, порача Пирц Мусар.
Таа оцени дека проширувањето на израелските населби го крши меѓународното право, ја поткопува можноста за решение со две држави и ги намалува изгледите за траен мир.
