Израелскиот премиер Бенјамин Нетанјаху упати порака за национално единство по повод еврејската Нова година – Рош Хашана, нагласувајќи дека и покрај политичките несогласувања, Израелците треба да се потсетат на она што ги обединува.
Во видеопораката објавена на платформата Икс, Нетанјаху порача дека во текот на изборната кампања ќе има бројни расправи и несогласувања, но дека во пресудните моменти народот знае да се обедини.
„Би било добро, барем додека седиме на маса, да се потсетиме на една едноставна работа што им ја кажав на нашите непријатели на почетокот на војната: не потценувајте нè. Зашто, во пресудниот момент, овој народ знае да се обедини“, рече Нетанјаху.
Тој ја повтори и својата порака дека Израел се соочува со борба на повеќе фронтови.
„Дали знаете друг народ кој се бори на седум фронтови и на сите победува?“, праша израелскиот премиер.
Нетанјаху истакна и дека сите израелски заложници во текот на оваа година се вратиле дома, додавајќи дека израелската иновативност и сила ја претвориле земјата во глобална сила.
Пораката за единство доаѓа во период кога се засилува изборната кампања за парламентарните избори. Сепак, според најновото истражување на јавното мислење, спроведено од порталот „Зман Израел“, коалицијата на Нетанјаху и натаму е далеку од потребните 61 пратеничко место за обезбедување парламентарно мнозинство.
