Израелскиот премиер Бенјамин Нетанјаху изјави дека Израел во овој момент ќе ги прекине нападите врз Иран, но нагласи дека конфликтот со Техеран и Хезболах не е завршен и дека неговата земја ќе продолжи да реагира на секој напад врз својата територија.
Во видеообраќање, Нетанјаху посочи дека по иранските напади врз Израел наредил израелската армија да изврши удари врз воени и економски цели низ Иран.
„Во моментов огнот на овој фронт е запрен, бидејќи по ударите врз режимот во Техеран тој престана да нè напаѓа“, изјави израелскиот премиер.
Тој предупреди дека доколку Иран повторно нападне, одговорот на Израел ќе биде силен и решителен.
Нетанјаху оцени дека Иран и Хезболах денес се послаби отколку кога било, додека Израел е посилен, но додаде дека борбата против нив сè уште не е завршена.
Според него, израелската армија ќе продолжи со операциите во јужен Либан со цел уништување на инфраструктурата на Хезболах во безбедносната зона.
Израелскиот премиер истакна дека истите ставови ги пренел и до американскиот претседател Доналд Трамп, кој во последните денови повикуваше на деескалација за да се зачуваат дипломатските напори меѓу Вашингтон и Техеран.
„Израел има целосно право на самоодбрана и ќе го користи тоа право секогаш кога ќе биде потребно“, порача Нетанјаху.
