Израелскиот премиер Бенјамин Нетанјаху ги отфрли изјавите на американскиот потпретседател Џеј Ди Венс дека американскиот претседател Доналд Трамп во моментов е единствениот светски лидер кој го поддржува Израел.
Во интервју за „Фокс њуз“, Нетанјаху беше запрашан да ја коментира изјавата на Венс дека Трамп е „единствениот шеф на држава во светот кој има симпатии кон Израел“. Израелскиот премиер одговори дека, иако има одлични односи со Венс, тоа не значи дека се согласува со сите негови ставови.
„Трамп е извонреден, најдобриот пријател што некогаш сме го имале во Белата куќа и целосно стојам зад тоа. Но, имаме и други пријатели“, изјави Нетанјаху.
Тој нагласи дека Израел ужива голема поддршка во Индија, а додаде дека бројни држави, и покрај притисокот од домашната јавност, продолжуваат да одржуваат добри односи со Израел.
„Многу лидери ми се јавуваат и ми велат дека имаат проблем со јавното мислење, но дека нè почитуваат и сакаат да соработуваат со нас, да научат нешто од нашата армија, како и од нашите достигнувања во областа на вештачката интелигенција и сајбер-безбедноста“, рече Нетанјаху.
Тој оцени дека односите на Израел со други земји не се секогаш такви какви што изгледаат во јавноста и повтори дека неговата држава има „многу пријатели“ ширум светот.
„Израел е меѓу водечките земји во светот во областа на сајбер-безбедноста, а нашата технологија е навистина напредна. Затоа велам дека имаме многу, многу пријатели“, порача Нетанјаху.
