Италијанскиот тенисер Матео Арналди приреди едно од најголемите изненадувања на годинашниот Ролан Гарос, откако по вистинска тениска драма го совлада Американецот Френсис Тијафо и за првпат во кариерата се пласираше во четвртфинале на Грен слем турнир.
По пет часа и 26 минути игра, Арналди славеше со 7:6, 6:7, 3:6, 7:6 и 6:4, комплетирајќи спектакуларен пресврт во меч во кој во еден момент беше на работ од елиминација.
Тијафо во четвртиот сет имаше водство од 4:1 со два брејка предност и беше многу блиску до победата. Американецот подоцна сервираше за триумф и се најде на само два поена од пласман во следната рунда.
Сепак, Арналди не се предаде. Италијанецот успеа да се врати во игра, да избори тај-брејк и да го освои четвртиот сет, а потоа со два брејка во решавачкиот петти сет да го заврши големиот пресврт.
„Отсекогаш сум сонувал да играм ноќен меч на Ролан Гарос. Во еден момент ова против Тијафо веќе не беше само тенис. Игравме со сè што имавме. Некој мораше да победи, а среќен сум што тоа бев јас. Ова е сигурно најдобриот натпревар во мојата кариера“, изјави Арналди по мечот.
Италијанецот во текот на дуелот спаси дури 17 од 25 брејк-топки и уште еднаш ја покажа својата извонредна борбеност на париската земјена подлога.
До четвртфиналето Арналди стигна по вкупно 17 часа и 42 минути минати на теренот, што претставува рекорд за најдолго време потребно на еден тенисер да стигне до оваа фаза на Грен слем турнир откако АТП почна да ја води оваа статистика во 1991 година.
Во борбата за полуфинале го очекува сонародникот Матео Беретини, кој претходно го елиминираше Хуан Мануел Серундоло.
Покрај нив двајца, меѓу осумте најдобри се најде и Флавио Коболи, со што Италија за првпат во историјата има тројца тенисери во четвртфиналето на ист Грен слем турнир.
Интересно е што меѓу нив не е првиот тенисер во светот, Јаник Синер.
