Српската тенисерка Анастасија Цветковиќ обезбеди пласман во четвртфиналето на јуниорскиот турнир на Ролан Гарос, откако во осминафиналето ја совлада Шпанката Паола Пињера Селорио со 2:0 во сетови (7:5, 6:0).
По мечот, 17-годишната тенисерка од Ниш изјави дека уште пред почетокот знаела дека ја очекува тежок дуел против противничка која оваа сезона има одлични резултати на земјена подлога.
„Знаев дека е квалитетна тенисерка и дека има одличен сервис. Влегов смирено во натпреварот, со цел да го чувам својот сервис и да ја искористам шансата на ритерн“, изјави Цветковиќ.
Таа се осврна и на контроверзната ситуација во првиот сет, при резултат 5:5 и изедначување, кога судијата го прекинал поенот иако размената не била завршена.
„Сите бевме во шок. Немав што да кажам во тој момент. Најважно ми е што останав смирена и не дозволив ситуацијата да ме исфрли од ритам. Веројатно токму тој гем беше пресуден“, рече младата Србинка.
Цветковиќ истакна дека во последните месеци значително напредувала на психолошки план и дека работата со тренерите ѝ помогнала подобро да ги контролира емоциите на теренот.
„Порано бев понервозна и понезрела во одредени ситуации. Сега гледам голем напредок во однос на тоа како реагирам на теренот. Во вакви натпревари многу работи зависат од менталната сила, а не само од тенисот“, додаде таа.
Младата српска тенисерка нагласи дека добрата форма и убедливите победи на турнирот дополнително ѝ ја зголемуваат самодовербата во пресрет на четвртфиналниот настап.
