Во зоолошката градина „Пакави парк“ во белгискиот град Олмен е забележан исклучително редок природен феномен – женка белоусна бамбусова змија родила 12 младенчиња, иако со години не била во контакт со мажјак.
Ветеринарот Тим Баутс изјави дека веднаш се посомневал дека станува збор за необичен случај кога чуварите го известиле дека змијата, која подоцна го добила името Марија, донела на свет младенчиња.
Стручњаците утврдиле дека станува збор за партеногенеза – редок облик на бесполово размножување, при кој женката создава потомство без оплодување од мажјак. Кај одредени видови влекачи, овој механизам овозможува продолжување на видот кога нема мажјаци.
Според Баутс, при овој процес јајце-клетката се спојува со дел од сопствената клетка, наместо со сперматозоид, при што се создава ембрион со генетски материјал речиси идентичен со оној на мајката.
Сите 12 младенчиња се мажјаци и, иако не се целосно идентични со мајката, генетски се многу блиски до неа.
Поради опасноста мајката да ги изеде, младенчињата веднаш биле одвоени од неа.
Змијата го добила името Марија, инспирирано од симболиката на „безгрешното зачнување“, а ветеринарот на шега предложил 12-те младенчиња да бидат именувани по апостолите.
Од зоолошката градина посочуваат дека ова е прв ваков случај регистриран во Белгија и првпат забележан кај овој вид змија, иако партеногенезата претходно била евидентирана кај други видови, меѓу кои и комодските змејови. Посетителите веќе можат да ги видат младенчињата во „Пакави парк“.
