Незаконска сеча на дрва и штета од 570.569 денари, кривична за четворица вработени во Подрачното шумско стопанство „Јабланица“ – Струга

Одделението за внатрешни работи Струга поднесе кривична пријава против четири лица од Вевчани поради сомнение дека со злоупотреба на службената положба и несовесно работење овозможиле противправна имотна корист на приватно правно лице и предизвикале штета на ЈП „Национални шуми“ во износ од 570.569 денари.

— реклама —

Според МВР, пријавени се В.Р. (56), З.П. (61), А.А. (61) и Т.Д. (49), сите од Вевчани, поради постоење основи на сомнение за сторени кривични дела „злоупотреба на службена положба и овластување“ и „несовесно работење во службата“.

— реклама —

Како раководител на Подрачното шумско стопанство „Јабланица“ – Струга, првопријавениот, спротивно на своите законски овластувања и без согласност од директорот на ЈП „Национални шуми“, склучил договор за позајмица со правно лице од струшкото село Велешта. Воедно, со неизвршување на службените должности и непостапување по надзорот, не спречил ниту санкционирал незаконски дејствија на останатите вработени.

— реклама —

Според пријавата, второ- и третопријавениот, вработени во Подрачното шумско стопанство „Јабланица“ – Струга, не доставувале примероци од испратници до сметководството и не евидентирале сеча на 127,32 кубни метри буково огревно дрво. Четвртопријавениот, пак, во една испратница внесувал два различни договори и двајца купувачи, спротивно на своите службени должности.

— реклама —

Со ваквото постапување, според МВР, на правното лице од селото Велешта му било овозможено бесправно да го пренесе незаконски исеченото огревно дрво до својот склад и да се стекне со противправна имотна корист, при што на ЈП „Национални шуми“ му била причинета штета во висина од 570.569 денари.