„Никој повеќе не и верува на власта -невработеноста се намалува само поради иселувањето“, вели СДСМ

СДСМ преку соопштение ја обвини Владата дека намалувањето на невработеноста не е резултат на економски раст и отворање нови работни места, туку последица на иселувањето на младите од државата.

— реклама —

Од партијата велат дека младите сè почесто ја напуштаат земјата поради, како што наведуваат, недостиг на перспектива, корупција, партизација на институциите и застој на европскиот интегративен процес.

„Без европска интеграција нема економски просперитет, нема повисоки плати, нема квалитетни работни места и нема иднина. Младите тоа го знаат и затоа заминуваат“, наведуваат од СДСМ.

— реклама —

Според опозициската партија, наместо реални економски политики, Владата презентира оперативни планови, програми и мерки кои, според нив, претставуваат обид за подобрување на јавниот имиџ пред евентуални предвремени избори.

— реклама —

Од СДСМ во соопштението оценуваат дека по две години владеење не се исполнети клучните ветувања дадени пред граѓаните и дека намалувањето на невработеноста се користи како статистички показател што не ја отсликува реалната состојба на пазарот на трудот.

Во соопштението се наведува и дека граѓаните, особено младите, ја губат довербата во актуелната власт, бидејќи не гледаат конкретни резултати во подобрувањето на животниот стандард и економските перспективи.

— реклама —

Од партијата порачуваат дека наместо, како што велат, „козметички мерки и статистички трикови“, потребни се суштински политики за задржување на младите и забрзување на европскиот пат на државата.