Николоски за грабежот во Драчево: Без луѓе од ЕВН и „Железница“ оваа кражба не можела да се изведе

Кражбата на електровлечната потстаница во Драчево не можела да биде изведена без ангажман на лица со висока стручност, а министерот за транспорт Александар Николоски смета дека во случајот можеби биле вклучени и лица од ЕВН и од „Железница“.

— реклама —

Николоски во гостување на Телма го опиша настанот како „филмски“ грабеж, при кој биле украдени вредни компоненти од два електроенергетски трансформатори тешки повеќе од 30 тони.

„Јас сум убеден, но секако јас не ја водам истрагата, туку МВР, но јас сум убеден дека без луѓе од ЕВН и без внатрешни луѓе од „Железница“ ова не може да се направи и веројатно тоа истрагата ќе го потврди“, изјави Николоски.

— реклама —

При кражбата, двата трансформатори биле насилно превртени, а од нив било истурено трансформаторското масло. Бакарните намотки и други вредни компоненти биле отстранети и украдени.

— реклама —

Според Николоски, станува збор за операција која била изведена во текот на една ноќ и барала висока стручност, особено поради работата со висок напон и употребената механизација.

Електровлечната потстаница во Драчево е во сопственост на „Македонски железници – инфраструктура“, а според првичните проценки, материјалната штета изнесува околу пет милиони евра.

По кражбата, значаен дел од електроенергетската опрема на железничката инфраструктура бил уништен, поради што објектот во моментов е нефункционален. Истрагата ја води Министерството за внатрешни работи.