Николоски: Преку 6 милиони евра директна помош за Кичево, инвестираме за инфраструктурен развој на општината

Заменик-претседателот на Владата и министер за транспорт, Александар Николоски, денеска беше во работна посета на Кичево, каде што заедно со градоначалникот Александар Јовановски изврши увид во реконструкцијата на улицата „Рудничка“.

— реклама —

Проектот се реализира преку Министерството за транспорт, во соработка со Општина Кичево, а вредноста на инвестицијата изнесува околу 30 милиони денари.

— реклама —

Николоски информираше дека преку различни владини програми во инфраструктурниот развој на Кичево се вложуваат вкупно околу 360 милиони денари, односно шест милиони евра.

Според него, градежните работи на втората фаза од улицата „Рудничка“ започнале на 15 октомври и треба да завршат во рок од шест месеци. Првата фаза веќе е реализирана во соработка со Светската банка, а со завршувањето на втората улицата ќе добие булеварско решение.

— реклама —

Вицепремиерот најави продолжување на поддршката за општината и посочи дека меѓу значајните инфраструктурни проекти се и автопатот Охрид–Кичево, каде што, како што рече, работите се одвиваат со добра динамика, како и автопатот Кичево–Букојчани, чија изградба започнала на 11 октомври.

„Ќе продолжиме да го поддржуваме Кичево“, порача Николоски.