На денешната седница за пратенички прашања, министерот за дигитална трансформација Стефан Андоновски посочи дека развојот на центрите за податоци се планира паралелно со гарантирањето на сигурното снабдување на граѓаните со електрична енергија и вода.
Андоновски објасни дека Владата работи во две насоки – создавање услови за приватни инвестиции во центри за податоци и изградба на Национален центар за податоци, наменет за потребите на државните институции.
Според него, приватните центри за податоци може да донесат нов капитал, ангажман за домашните компании, специјализирани работни места и дополнителен развој на ИКТ-индустријата. Националниот центар, пак, е предвиден како дел од модернизацијата и заштитата на државната дигитална инфраструктура.
Министерот нагласи дека секој потенцијален проект ќе мора да ги помине техничките, водостопанските, еколошките и сите други законски постапки. Приватните инвеститори, како што посочи, ќе треба сами да ги обезбедат потребните енергетски ресурси согласно законските процедури и по пазарна цена.
Националниот центар за податоци е планиран со инсталирана моќност под еден мегават и ќе ги опслужува информациските системи на државните институции. Планот е системите што можат безбедно да се обединат постепено да се префрлат од повеќе од 20 одделни серверски и податочни локации во заедничка инфраструктура.
Центарот треба да биде поврзан и со резервната инфраструктура во Прилеп, со цел да се обезбеди поголем континуитет на критичните системи.
Андоновски информираше дека е изработена физибилити студија, утврдена е потенцијална локација во близина на Скопје, а во тек е работата на финансискиот модел и потребните постапки.
Проектот е дел од Планот за раст на Европската унија, а за него се обезбедени 20 милиони евра, од кои 30 проценти се грант од ЕУ. Поставувањето камен-темелник е планирано за 2027 година, во зависност од завршувањето на финансирањето и потребните постапки.
„Податочните центри треба да донесат нов капитал и нови можности за македонската економија. Но ниту еден инвестициски проект нема да добие предност пред сигурното снабдување на граѓаните со вода и електрична енергија“, порача Андоновски.
