Мостот „Естакада“ во Гази Баба се асфалтира во ноќните часови, со цел работите да имаат што помало влијание врз сообраќајот во текот на денот. За активностите информираше Орце Ѓорѓиевски, кој заедно со Бобан Стефковски синоќа беше на терен.
Санацијата ги опфаќа пристапните рампи на вкупна површина од 10.000 квадратни метри. Од нив, 3.800 квадратни метри се целосно обработени со гребење и поставување два нови слоја асфалт, додека на самиот мост се поставува нов асфалтен слој.
Вкупната должина на коловозот што се санира изнесува 1,5 километри. Во рамки на зафатот се поставени и нови рабници и тротоари, а предвидени се и бојадисување на заштитната пешачка ограда и поставување нови капаци за шахтите.
Според Ѓорѓиевски, ноќното изведување на работите ќе продолжи секаде каде што условите го дозволуваат тоа, со цел да се намалат сообраќајниот застој и гужвите во текот на денот.
Тој посочи дека санацијата е одговор на долгогодишно барање на илјадници жители и дека целта е да се обезбеди побезбедно и непречено движење за сите учесници во сообраќајот.
