Градоначалникот на Општина Аеродром, Дејан Митески, денеска изврши увид во градежните активности на сообраќајна делница во општината која, како што соопштија од локалната самоуправа, за првпат добива целосна реконструкција.
Со проектот се обновува делница во должина од 777 метри, при што се поставуваат околу 6.000 квадратни метри нов асфалт и нови тротоари на површина од 1.500 квадратни метри.
Од Општината посочуваат дека за првпат на оваа делница ќе биде поставено и улично осветлување, со што се очекува подобрување на безбедноста, видливоста и условите за одвивање на сообраќајот.
Станува збор за фреквентен потег што секојдневно го користат и граѓаните и компаниите што функционираат во овој дел на Аеродром.
Вредноста на инвестицијата изнесува 17 милиони и 908 илјади денари.
Проектот е дел од поширокиот циклус за реконструкција на улици во Општина Аеродром, кој опфаќа вкупно 5,4 километри патна инфраструктура, со вкупна вредност од 138 милиони денари, средства обезбедени од Владата преку Министерството за транспорт и врски.
„Продолжуваме посветено да инвестираме во модерна, безбедна и функционална инфраструктура за сите граѓани“, соопштија од Општина Аеродром.
