Општина Аеродром изрече казна од 20.000 евра во денарска противвредност за фирмата која беше фатена при незаконско одлагање градежен отпад во Долно Лисиче.
Градоначалникот Дејан Митески објави дека при вонреден инспекциски надзор на локацијата викана „Купишта“ бил затекнат камион кој истурал градежен шут и ископана земја спротивно на Законот за управување со отпад.
Според прекршочниот платен налог издаден од општинскиот инспекторат, станува збор за фирмата „ХСА-Конструкцион“ ДООЕЛ увоз-извоз Батинци, Студеничани.
Во документот стои дека инспекторите констатирале прекршување на член 37 од Законот за управување со отпад, според кој е забрането оставање, фрлање и напуштање отпад на локации што не се определени за таа намена.
„За сторениот прекршок е изречена глоба од 20.000 евра во денарска противвредност“, објави Митески.
Тој порача дека Општина Аеродром ќе продолжи со засилени инспекциски контроли и нема да дозволи создавање диви депонии и уништување на животната средина.
Претходно, дел од медиумите објавија дека сопственик на фирмата е Харис Качапор, кому во моментов му се суди за смртоносното прегазување на поранешниот директор на ОХИС, Јорго Ќука.
Според обвинението, сообраќајката се случила на 3 ноември на булеварот „Гоце Делчев“, по што Качапор го напуштил местото. Подоцна беше уапсен во болница, каде, според неговото објаснување, отишол на лекар.
Качапор претходно беше опфатен и во предметот „Синџир“, каде се гонеше за „злосторничко здружување“, „даночно затајување“ и „перење пари“. Во тој случај се спогоди со обвинителството и доби условна казна.
