Жителите на Кочани и околните места отсега ќе можат на едно место да добиваат помош и пристап до електронските услуги на институциите, откако во општината беше отворен нов Центар за услуги – ЕТУ Кочани.
Центарот го промовираа министерот за дигитална трансформација Стефан Андоновски и градоначалникот на Кочани Влатко Грозданов. Преку него граѓаните ќе можат да добијат поддршка при користењето на Националниот портал uslugi.gov.mk, како и при поднесувањето електронски барања и завршувањето на административните обврски.
Андоновски истакна дека целта е дигиталните услуги да бидат достапни за сите граѓани, вклучително и за оние на кои им е потребна помош при користењето на електронските услуги.
„Со овој Центар за услуги им го олеснуваме пристапот на граѓаните на Кочани до услугите на институциите. Овде ќе можат да добијат помош за користење на Националниот портал uslugi.gov.mk, да поднесат барање за потребниот документ и полесно да ги завршат своите административни обврски“, истакна Андоновски.
Во центарот ќе бидат достапни електронските услуги од Националниот портал, меѓу кои издавање извод од матичната книга на родените, документи од казнената и кривичната евиденција, како и услуги од Агенцијата за катастар на недвижности, Фондот на ПИОМ и други институции.
Андоновски им се заблагодари на градоначалникот Грозданов и на Советот на Општина Кочани за поддршката во реализацијата на проектот.
„По бесплатните Wi-Fi зони што ги доби Кочани, денес реализираме уште едно ветување кон граѓаните. Со ваква соработка создаваме услови граѓаните побрзо и поедноставно да доаѓаат до услугите што им се потребни“, посочи тој.
Градоначалникот Грозданов изрази благодарност до Андоновски за соработката и реализацијата на проектот, истакнувајќи го неговото значење за жителите на Кочани и околината.
Во рамки на работната посета, Андоновски ќе оствари и средби со претставници на компании од ИТ-секторот и со членовите на СТЕМ-клубот за роботика од Кочани.
