Renault го претстави освежениот Megane E-Tech Electric за новата моделска година, носејќи значајни промени во дизајнот, технологијата, батеријата и опремата.
Целосно електричниот компактен модел, кој првпат беше претставен во 2022 година, сега добива темелно освежување со модернизиран изглед и унапредени технички карактеристики.
Најголемите визуелни промени се забележуваат на предниот дел. Редизајнирани се браникот, светлосниот потпис и поставеноста на логото на Renault, додека новите LED елементи му даваат посовремен изглед. Новиот Megane потсетува на неодамна претставениот Alpine A390.
На задниот дел промените се посуптилни. Новите задни светла добија тродимензионален дизајн, а поради поголемата батерија возилото е повисоко за 20 милиметри.
Димензиите остануваат речиси непроменети – должината изнесува 4.200 милиметри, ширината 1.782 милиметри, а меѓуоскиното растојание е 2.685 милиметри. Багажниот простор нуди капацитет од 440 литри.
Моделот ќе биде достапен во пакетите Techno и Esprit Alpine. Основната верзија Techno сериски добива 19-инчни алуминиумски тркала, додека Esprit Alpine носи дополнителни спортски дизајнерски елементи и 20-инчни тркала.
Во внатрешноста се користат нови материјали и завршни обработки, а кабината е опремена со LED амбиентално осветлување. Пред возачот се наоѓаат 12,3-инчна дигитална инструмент-табла и централен екран од 12 инчи, кои работат преку системот OpenR Link со интегрирани Google Maps, Google Assistant и Google Play.
Renault најавува и интеграција на Google Gemini, додека новитети се и препознавање на возачот преку скенирање на лицето, безжичен полнач според стандардот Qi2 и можност за возење со една педала.
Една од најважните технички новини е новата литиум-железо-фосфатна батерија со корисен капацитет од 67 kWh. Според WLTP циклусот, досегот достигнува до 500 километри.
Зголемена е и максималната моќност на DC-полнењето на 165 kW, што овозможува батеријата да се наполни од 15 до 80 проценти за околу 24 минути.
