На денешната прес-конференција, членката на Извршниот одбор на СДСМ, Рената Младеновска, обвини дека најавите на премиерот Христијан Мицкоски за изградба на нов Клинички центар претставуваат уште едно неисполнето ветување и обид за, како што велат, „замајување на јавноста“.
На прес-конференција, Рената Младеновска, истакна дека проектот за нов Клинички центар не бил реализиран поради блокадите на ВМРО-ДПМНЕ во периодот кога партијата била во опозиција.
„Во 2021 година ВМРО-ДПМНЕ поднесе над 2.000 амандмани за да ја закочи изградбата на новиот Клинички центар. Политичките интереси ги ставија пред здравјето на граѓаните“, рече Младеновска.
Таа оцени дека локацијата што сега ја предлага Владата е несоодветна за изградба на ваков комплексен здравствен објект, посочувајќи дека во непосредна близина се планирани и други големи инфраструктурни проекти. Според неа, стручната јавност подолг период укажува дека најсоодветна локација за нов Клинички центар е Ѓорче Петров.
Младеновска отвори и прашања околу постапката за обезбедување земјиште, прашувајќи по кој закон и врз основа на какви одлуки Владата преговара со приватни сопственици.
„Нема резултати, има само лажни ветувања. Сè ова е ставено во функција на изборите“, порача таа, додавајќи дека граѓаните веќе не им веруваат на најавите за големи проекти и инвестиции.
Од СДСМ велат дека јавноста заслужува транспарентност и конкретни решенија, наместо, како што наведуваат, нови предизборни ветувања без реална основа.
