Полскиот претседател Карол Навроцки најави дека ќе покрене постапка за одземање на највисокото полско државно одликување на украинскиот претседател Володимир Зеленски, по одлуката на Киев една украинска воена единица да го добие почесниот назив „Херои на УПА“.
Според полскиот портал „Онет“, Навроцки изјавил дека предложил ова прашање да биде ставено на дневен ред на седницата на комисијата за Орденот на Белиот орел, закажана за 8 јуни.
„Предложив една од точките да биде одземање на одликувањето на претседателот Володимир Зеленски“, изјавил Навроцки пред новинарите.
Спорот избувна откако Зеленски одлучи елитната украинска единица „Север“ да го носи почесниот назив „Херои на УПА“, односно Украинска востаничка армија.
Навроцки оцени дека ваквата одлука ѝ дава аргументи на руската пропаганда и дополнително ги продлабочува историските тензии меѓу Полска и Украина.
„Претседателот Зеленски ѝ обезбеди најдобар материјал и многу кислород на руската пропаганда“, изјави полскиот претседател.
Реагираше и полското Министерство за надворешни работи, од каде соопштија дека одлуката на Киев „го навредува сеќавањето на жртвите на таа организација и го поткопува дијалогот меѓу двата народа“.
Зеленски, пак, претходно изјави дека одлуката има цел да ги обнови „историските традиции на националната армија“ и да ја признае улогата на единицата во одбраната на независноста и територијалниот интегритет на Украина.
Орденот на Белиот орел му беше доделен на Зеленски во 2023 година од тогашниот полски претседател Анджеј Дуда, како признание за одбраната на Украина од руската инвазија и за блиското партнерство меѓу Варшава и Киев.
Според полските закони, државно одликување може да биде одземено доколку се утврди дека добитникот извршил дела што го прават недостоен за таа чест, но за таква одлука е потребна формална постапка и одобрување од полскиот премиер.
