Претседателот на ФИФА, Џани Инфантино, се соочува со ново откажување на поддршката пред изборите за четврти мандат. Фудбалскиот сојуз на Нов Зеланд одлучи да не застане зад неговата кандидатура, а воедно побара и независна ревизија на постапките поврзани со проектот „FIFA Forward Enterprise Scheme“ (FFE).
Од Новозеландскиот фудбалски сојуз велат дека одлуката била донесена по детално разгледување на случувањата и проценката дека одредени одлуки и активности во рамки на ФИФА придонеле за нарушување на довербата и продлабочување на поделбите во меѓународниот фудбал.
„Потребна е независна ревизија за да се обнови довербата“, наведуваат од сојузот.
Нов Зеланд истовремено ги прекинал односите со Фудбалската конфедерација на Океанија (ОФЦ), додека ОФЦ во својата реакција не го споменала директно Инфантино. Конфедерацијата ја поздравила одлуката на ФИФА да го повлече предлогот за проектот FFE и најавила дека ревизијата треба да овозможи утврдување и спроведување на евентуалните потребни промени.
Инфантино претходно останал без поддршка и од УЕФА, АФЦ и КОНКАКАФ, откако наишол на отпор поради планот за продажба на 20 отсто од комерцијалните права поврзани со Светското првенство на приватни инвеститори. Од друга страна, КАФ и КОНМЕБОЛ останале зад актуелниот претседател на ФИФА и ја поддржале неговата намера да се кандидира за нов мандат.
Со одлуката, Нов Зеланд се приклучи кон групата национални фудбалски сојузи кои веќе најавија дека нема да го поддржат Инфантино. Меѓу нив се Англија, Велс, Норвешка, Република Ирска и Северна Ирска.
Особено внимание привлекува фактот што Нов Зеланд е единствената од 11-те членки на ОФЦ која ќе настапи на претстојното Светско првенство.
Инфантино е на чело на ФИФА од 2016 година и долго време се сметаше дека без поголеми проблеми ќе обезбеди и четврти мандат. Сепак, контроверзиите околу предлогот за приватни инвеститори и сè поголемиот број сојузи кои му ја повлекуваат поддршката ја променија ситуацијата.
Рокот за поднесување кандидатури за потенцијалните противкандидати на Инфантино истекува на 18 ноември, а изборите треба да се одржат во март во Мароко.
