Канада им се придружи на Австралија, Индонезија и Малезија во воведувањето ограничувања за користење на социјалните мрежи од страна на малолетниците, откако беше претставен новиот Закон за безбедни социјални медиуми.
Со законот, кој го предложи канадскиот министер за идентитет и кулура Марк Милер, на лицата помлади од 16 години ќе им биде забрането да отвораат и користат профили на социјалните мрежи.
Покрај старосните ограничувања, новите правила предвидуваат платформите да ги дизајнираат своите услуги така што ќе бидат побезбедни за децата. Од нив ќе се бара да отстрануваат дипфејк содржини, како и материјали што сексуално ги експлоатираат децата или повторно ги трауматизираат жртвите.
Законот воведува и задолжителни ознаки за содржини создадени со вештачка интелигенција, јасни механизми за пријавување штетни објави и алатки за блокирање на корисници со цел да се спречи понатамошна изложеност на опасни содржини.
Иако воведува ограничувања за социјалните мрежи, законот не се однесува директно на услугите за чет-ботови базирани на вештачка интелигенција. Сепак, платформите што нудат вакви услуги ќе мора да преземат мерки за намалување на ризикот од ширење штетни содржини и да воведат итни процедури за постапување во кризни ситуации.
Деталните правила ќе ги утврдува новоформираната Комисија за дигитална безбедност на Канада, која ќе биде задолжена за спроведување на прописите и ќе може да одобрува исклучоци за платформите што ќе докажат дека имаат доволно заштитни механизми за малолетните корисници.
Новите мерки доаѓаат во време кога сè повеќе држави се обидуваат да воспостават построга контрола врз дигиталниот простор и да ги заштитат децата од потенцијално штетните влијанија на интернет.
