Илјадници жители на Северниот Остров во Нов Зеланд се евакуираат поради најавената циклонска бура Вајану, која според прогнозите може да предизвика сериозни поплави и свлечишта.
Државниот метеоролошки завод предупреди дека бурата, проследена со силни врнежи и ветрови со брзина до 130 километри на час, се очекува да ја погоди земјата во недела, а потоа да се движи западно од островите Чатам.
Во неколку региони веќе е прогласена вонредна состојба, додека во градот Вакатане, со околу 37 илјади жители, властите наредија евакуација.
Граѓаните се повикани да ги напуштат своите домови најмалку два дена, поради ризик од свлечишта, покачување на нивото на морето, како и бранови кои може да достигнат висина до 13 метри.
Премиерот Кристофер Луксон предупреди на сериозноста на ситуацијата и ги повика граѓаните да се подготват.
„Проверете ги одводите, внимавајте на соседите и подгответе се за можни прекини на струјата“, изјави Кристофер Луксон.
Циклонот Вајану потсетува на разорната бура Габриел од 2023 година, која однесе 11 животи и расели илјадници луѓе, оставајќи длабоки последици во земјата.
