Армијата на Република Македонија денеска одбележува 34 години од формирањето, со нагласок на развојот на современи способности, модернизацијата и исполнувањето на НАТО-стандардите. Во изминатата година, според Армијата и Министерството за одбрана, се реализирани значајни проекти во опремувањето, обуката и трансформацијата на армиските единици.
Како еден од најзначајните професионални успеси се издвојува оценувањето на Лесната пешадиска баталјонска група на вежбата „Блесок 26“. Единицата беше оценета како „борбено подготвена за извршување на својата мисија“, со што е потврдена нејзината обученост, опременост и интероперабилност со сојузничките сили.
Во меѓународните мисии во моментов се распоредени повеќе од 180 припадници на Армијата во Романија, Бугарија, Летонија, Косово, Босна и Херцеговина и Либан, како и во рамките на мисијата NSATU на НАТО. Воедно, повеќе од 300 армиски припадници се подготвени за ангажирање во справувањето со пожари и други кризни состојби во земјава.
Армијата е во еден од најинтензивните циклуси на модернизација од своето формирање. Во 2026 година за модернизација и опремување се издвоени 116 милиони евра, односно 32,5 проценти од вкупниот одбранбен буџет.
Во оперативна употреба се воведени артилерискиот систем „Боран“, оклопните возила JLTV и „Страјкер“, додека се испорачува и противвоздушниот систем „Мистрал“. Во втората половина од годината се очекува и пристигнување на два нови хеликоптера. Паралелно се реализираат и проекти со САД, меѓу кои е набавката на противтенковски системи „Џавелин“, чија испорака е планирана за 2027 и 2028 година.
Дополнителна поддршка е обезбедена преку Европскиот мировен фонд, со три пакети помош во вредност од 38 милиони евра, како и два милиони евра за Балканските медицински наменски сили.
Покрај опремувањето, во фокусот се и армиската инфраструктура, беспилотните системи и сајбер-безбедноста. За 2026 и 2027 година се планирани повеќе од 12 милиони евра за градежни зафати во касарните.
Одбранбените институции посочуваат дека современите безбедносни закани бараат постојано унапредување на способностите, особено во делот на заштитата од беспилотни летала и сајбер-напади. Во таа насока функционира и Сајбер оперативниот центар со Воен тим за одговор на сајбер инциденти.
Со учеството во меѓународни мисии, поддршката на цивилните институции и инвестициите во модернизација, Армијата ја одбележува 34-годишнината со фокус на својата основна мисија – заштита на независноста, територијалниот интегритет и безбедноста на државата и граѓаните.
