Градоначалникот на Скопје, Орце Ѓорѓиевски, информира дека низ главниот град се реализираат повеќе активности насочени кон подобрување на сообраќајната безбедност, уредувањето на јавниот простор и одржувањето на градската инфраструктура.
„Скопје се уредува до најситен детал“, порача Ѓорѓиевски, посочувајќи дека покрај капиталните проекти, подеднакво внимание се посветува и на секојдневните активности кои, како што вели, придонесуваат за поголем ред и подобар квалитет на живот.
Според него, во тек е интензивно обележување на хоризонталната сигнализација и замена на дотраените сообраќајни знаци на повеќе градски сообраќајници.
„Јасната, видлива и функционална сигнализација е основа за побезбеден сообраќај и подобра организација во градот“, истакна Ѓорѓиевски.
Тој информира и дека се поставуваат заштитни столпчиња долж булеварите со цел да се заштитат пешачките и велосипедските патеки и да се спречи непрописното паркирање.
„Узурпацијата на јавниот простор не смее и нема да биде пракса во Скопје“, нагласи Ѓорѓиевски.
Паралелно со овие активности, се работи и на уредување на зеленилото, одржување на парковите и јавните површини, како и на чистење на коритото на реката Вардар.
Според Ѓорѓиевски, активности се спроведуваат и во Зоолошката градина во Скопје, каде се уредуваат пешачките зони, додека континуирано се подобруваат и пешачките и велосипедските патеки низ градот.
Тој посочи дека јавните претпријатија работат со полн капацитет со цел Скопје да биде почисто, побезбедно и поуредено место за живеење.
„Продолжуваме, за достоинствено Скопје“, порача Ѓорѓиевски.
