Борбени авиони на НАТО соборија дрон кој во текот на ноќта навлегол во воздушниот простор на Латвија, соопштија латвиските национални вооружени сили. Инцидентот предизвикал краткотрајна воздушна тревога во повеќе региони во источниот дел на земјата.
Според латвиската војска, дронот навлегол во воздушниот простор како последица на руско електронско војување, односно попречување на неговата навигација. По регистрирањето на леталото биле активирани борбените авиони на НАТО, кои ја извршуваат мисијата за воздушно патролирање над балтичките земји, по што дронот бил соборен.
Поради инцидентот биле издадени предупредувања за можната воздушна опасност во областите Балви, Резекне, Преили, Аугшдаугава и Алуксне. Предупредувањата биле укинати околу 4:50 часот, откако заканата била отстранета.
Латвиските власти соопштија дека истрагата за инцидентот е во тек. Засега не се објавени детали за видот на дронот, неговото потекло, ниту за местото каде што паднале остатоците.
Во меѓувреме, Финска привремено вовела ограничувања на воздушниот и поморскиот сообраќај во источниот дел на Финскиот Залив поради можната опасност од дронови.
Инцидентот се случил по украинските напади со дронови врз областа на Санкт Петербург. Гувернерот на Ленинградската област, Александар Дрозденко, соопшти дека нападите предизвикале пожар во нафтеното пристаниште Уст-Луга.
