Нови апсења за „Државна лотарија“: Две жени од финансии осомничени за злоупотреба на околу 80 милиони денари

Нова акција се спроведува за сомнежи за финансиски злоупотреби во АД „Државна лотарија“, а според неофицијални информации на „Скопје1“, опфатени се две жени кои работеле во секторот за финансии.

Станува збор за сомнежи за злоупотреба на околу 80 милиони денари, а дејствијата што се истражуваат, според информациите на „Скопје1“, започнуваат од 1 јануари 2024 година.

— реклама —

Сомнежите се однесуваат на начинот на кој биле евидентирани и движени парите од уплатните места за игри на среќа. Според неофицијалните информации, се истражува дали со фиктивна документација биле прикажувани исплати и добивки, како и дали пари биле префрлани од една на друга сметка за финансиски да се затвораат обврските.

— реклама —

Парите од уплатните места требало да бидат евидентирани и уплатени како дневен промет, но сомнежот е дека дел од средствата фактички ги немало, иако сметководствено состојбите биле затворани.

Акцијата ја спроведува Управата за финансиска полиција во координација со Обвинителството. Други медиуми денеска објавија дека се приведени две лица, меѓу кои и поранешна раководителка во финансискиот сектор на Државна лотарија.

— реклама —

Случајот се надоврзува на претходно утврдените неправилности во финансиското работење на Државна лотарија за 2024 година. Државниот завод за ревизија во својот извештај утврди дека дневниот промет од десет сопствени продажни места не бил редовно уплаќан на сметките на друштвото. Ревизорите констатираа и дека две уплати заведени како „дневен пазар“ всушност биле средства подигнати од една и уплатени на друга сметка на Државна лотарија.

ДЗР тогаш утврди и спорна документација за приливи и одливи поврзани со аванси за исплата на мали добивки, како и нереални и неоправдани сметководствени записи за повеќе трансакции.

Официјални детали за денешната акција, точниот број на опфатени лица и кривичните дела за кои се води постапката се очекуваат од надлежните институции.