Техничкиот советник ангажиран од семејството на повредениот Љубиша Каровиќ тврди дека прозорецот на авионот на „Рајанер“ не пукнал сам, туку бил скршен од дел што излетал од моторот. Ова го изјавил во интервју за грчката јавна телевизија ЕРТ, додека сè уште трае истрагата за инцидентот што се случил над македонското небо.
Според експертот Христос Главопулос, станува збор за дел од лопатка на турбината, кој го погодил прозорецот и предизвикал декомпресија во кабината, по што авионот се вратил во Солун, наместо да го продолжи летот кон Меминген.
Тој посочува две можни причини за оштетувањето – дефект на температурниот сензор Т12, кој се наоѓа во близина на местото каде што е забележано внатрешното оштетување на моторот, или кршење на лопатката поради замор на материјалот или внатрешен дефект.
Адвокатот на семејството, Василис Цијарас, потсети дека истиот авион ден претходно го прекинал летот од Солун кон Сараево и се вратил на аеродромот кратко по полетувањето.
„Не знаеме дали двата инциденти се поврзани, но сметаме дека постои пропуст во одржувањето. Сè започнало од десниот мотор“, изјавил Цијарас, додавајќи дека засега нема официјална потврда за поврзаност меѓу двата настани.
Љубиша Каровиќ е и натаму хоспитализиран во болницата АХЕПА во Солун. Според неговата сопруга Светлана, тој има повреди на вратот и рамото, како и изгореници, а сè уште е во шок од преживеаното.
Во следната фаза од истрагата ќе биде извршен првичен визуелен преглед на авионот, во кој ќе учествуваат надлежните истражни органи и техничкиот советник ангажиран од семејството на повредениот патник.
