ВМРО-ДПМНЕ преку соопштение вели дека здравствениот сектор е меѓу приоритетите на Владата предводена од ВМРО-ДПМНЕ, од каде што велат дека во тек се повеќе проекти за изградба, реконструкција и модернизација на здравствените установи.
Како дел од инвестициите се посочуваат новите клинички болници во Штип и Тетово, како и проширувањето на Здравствениот дом во Кичево. Во рамки на проектите се предвидени и студентски дом и Факултет за медицински науки, а според партијата веќе постои интерес од потенцијални финансиери.
Паралелно се разгледува и изградба на нов Клинички центар во Скопје, со можна локација кај комплексот „Борис Трајковски“. Планот предвидува современ здравствен комплекс кој би бил поврзан со болницата „8 Септември“ преку топол подземен премин. Во целината би биле интегрирани и ПЕТ-центарот и поликлиниката „Букурешт“.
Од ВМРО-ДПМНЕ посочуваат дека инвестициите не се однесуваат само на нови објекти, туку и на подобрување на постојната здравствена инфраструктура.
Во болницата „8 Септември“ се реконструирани оперативниот блок, интензивната нега, патологијата, лабораторијата и кровот, додека е обновена и трауматологијата во Старата градска болница.
Во ГАК се вложени 110 милиони денари за реконструкција и опремување, а во Клиничкиот центар „Мајка Тереза“ се обновени шест операциони сали, додека уште четири се очекува да бидат ставени во функција.
Според партијата, досега се реконструирани повеќе од 10 здравствени објекти и клиники, а во здравствениот систем е набавена современа медицинска опрема вредна неколку милиони евра.
