Европската комисија предложи нови мерки со кои Google ќе треба да им овозможи на конкурентските пребарувачи пристап до податоците од пребарувањата, со цел усогласување со Законот за дигитални пазари.
Предлогот опфаќа и податоци поврзани со чет-ботови базирани на вештачка интелигенција, како и функции за пребарување, при што се предвидуваат строги правила за обемот, начинот и зачестеноста на споделувањето на податоците.
Од Европска комисија наведуваат дека мерките вклучуваат и механизми за заштита на приватноста, особено преку анонимизација на личните податоци, како и јасни процедури за пристап до информациите и утврдување на нивната цена.
Од компанијата, пак, реагираа дека ќе се спротивстават на овие барања, оценувајќи дека тие ги надминуваат дозволените граници и може да ја загрозат приватноста на корисниците.
Целта на предложените правила е да им се овозможи на другите онлајн пребарувачи да ги подобрат своите услуги и да ја оспорат доминантната позиција на Google на пазарот.
Заинтересираните страни имаат рок до 1 мај да достават мислења за предлог-мерките, по што се очекува конечната одлука да биде донесена во јули.
