Министерката за енергетика, рударство и минерални суровини Сања Божиновска денеска во Истанбул ќе ги претстави енергетските и инвестициските потенцијали на Македонија пред турската бизнис-заедница, во рамки на Бизнис форумот Северна Македонија – Турција, посветен на продлабочување на економската соработка меѓу двете земји.
На форумот ќе присуствува и висока македонска владина делегација, предводена од премиерот Христијан Мицкоски, во чиј состав се министри од економските, енергетските и инфраструктурните ресори. Домаќин на настанот од турска страна ќе биде министерот за трговија на Турција, проф. д-р Омер Болат, а организацијата ја реализираат турското Министерство за трговија и Советот за надворешни економски односи – DEİK.
Настанот ќе ги обедини претставниците на владите, институциите и бизнис-заедниците од двете држави, со цел да се интензивира трговската размена, да се поттикнат нови инвестициски иницијативи и да се создадат нови партнерства.
Во рамки на форумот, Божиновска ќе учествува на панел-дискусијата „Билатерална соработка во трговијата, индустријата, производството и синџирите на снабдување“, каде ќе ги презентира можностите што ги нуди државата во секторите енергетика, рударство и минерални суровини, како и реформите насочени кон создавање стабилна и предвидлива инвестициска клима.
На маргините на форумот, министерката ќе оствари и билатерална средба со турскиот министер за трговија Омер Болат, на која се очекува да се разговара за унапредување на економската соработка, зголемување на турските инвестиции во Македонија и можностите за заеднички проекти во енергетиката, рударството и развојот на стратешките индустрии.
Бизнис форумот се смета за важна платформа за поврзување на институциите и деловната заедница од Македонија и Турција, со цел отворање нови перспективи за инвестиции и поттикнување на одржлив економски развој.
