Руските сили спроведуваат тактика на намерни напади врз цивилни цели во Харкивската област, предупреди регионалниот гувернер Олег Синехубов, пренесува локалниот медиум Gwara Media.
„Непријателот директно цели врз цивили, амбулантни возила, евакуациски средства и возила на итните служби. Тоа се приоритетни мети“, изјави Синехубов.
Само вчера, Русија изврши ракетен напад врз складиште во селото Васјишчеве, на периферијата на Харкив. Во нападот загина едно лице, а седум беа ранети, меѓу кои и припадници на противпожарната служба. Целосно се уништени објекти со цивилна стока.
Ист ден, руските сили нападнаа и два реона во Харкив – Шевченковски и Слободски – при што беа повредени три лица. Нападите предизвикаа пожари на возила и згради, а итните служби интервенираа цела ноќ.
Во Купјанск, град со висока логистичка важност за областа, руските напади усмртија едно лице, а две други беа повредени. Градот е речиси целосно уништен – само 5% од објектите се останати недопрени.
Во вторникот, руските сили ја нападнаа Новоплатонивка (општина Борова), при што загинаа седум лица, а двајца беа повредени. Неколку од жртвите починале во болница. Нападот се случил додека луѓето чекале хуманитарна помош.
Харкивската област, која се наоѓа на североистокот на Украина, на самата граница со Русија, е постојано изложена на напади од север, исток и југоисток.
