СДСМ преку соопштение обвини дека најновите статистички податоци покажуваат влошување на животниот стандард на граѓаните и ги отфрли тврдењата на Владата за економски успеси.
Од партијата велат дека реалноста со која се соочуваат граѓаните е поинаква од владините оценки, посочувајќи дека цените на храната, превозот и останатите секојдневни трошоци продолжуваат да растат.
Според СДСМ, трошоците на животот во мај годинава се зголемени за 4,8 проценти во однос на истиот месец минатата година, додека цените на мало пораснале за 5,6 проценти.
„Платите не растат доволно брзо за да го следат поскапувањето, а нема ниту нови мерки за заштита на животниот стандард на граѓаните“, наведуваат од партијата.
Од СДСМ посочуваат дека зголемените цени на храната, сметките и превозот претставуваат сè поголем товар за семејните буџети, додека синдикалната потрошувачка кошничка бележи постојан раст.
Партијата оценува дека куповната моќ на граѓаните опаѓа и дека официјалните статистички показатели покажуваат оти животот е поскап во споредба со пред една година.
„Бројките јасно покажуваат дека животниот стандард се намалува, а граѓаните се соочуваат со сè поголеми финансиски предизвици“, наведуваат од СДСМ.
