Нови тензии меѓу САД и Канада: Откажано заедничкото отворање на мостот „Горди Хау“

Планираната заедничка церемонија на САД и Канада по повод отворањето на Меѓународниот мост „Горди Хау“, што требаше да се одржи во петок, е откажана откако американскиот претседател Доналд Трамп најави воведување царини од 50 отсто за поголемиот дел од канадските производи.

Со најавата за новите царини, Трамп ја обвини Канада дека неправедно ја дискриминира американската автомобилска индустрија, алкохолните пијалаци и млечните производи, што дополнително ги заостри односите меѓу двете соседни држави.

— реклама —

„Со оглед на трговските мерки што САД ги најавија на почетокот на оваа недела, не би било соодветно да се одржи заедничка свеченост меѓу двете земји“, изјави портпаролката на канадскиот министер за инфраструктура, Џена Гасабех.

Канада најави дека ќе организира сопствена церемонија, додека сè уште не е познато дали и САД ќе одржат посебен настан.

— реклама —

И покрај дипломатските тензии, американски претставници очекуваат мостот да биде пуштен во сообраќај во понеделник, иако признаваат дека веќе не се толку сигурни во тој рок.

— реклама —

Мостот „Горди Хау“, долг околу 2,4 километри, ја преминува реката Детроит и ги поврзува американскиот град Детроит и канадскиот Виндзор. Неговата изградба, вредна речиси 4,4 милијарди долари, беше финансирана од Канада, која треба да ги врати вложените средства преку наплата на патарина.

Проектот се реализира од 2018 година, а мостот го носи името на легендарниот канадски хокејаш Горди Хау, кој 25 сезони настапуваше за тимот „Детроит Ред Вингс“.

Во меѓувреме, трговските несогласувања продолжуваат да се продлабочуваат. Канадскиот премиер Марк Карни порача дека неговата влада и понатаму е подготвена за преговори со администрацијата на Трамп и дека верува во придобивките од слободната и фер трговија.

Премиерот на Онтарио, Даг Форд, пак, предупреди дека доколку американските царини стапат во сила, Канада треба да одговори со реципрочни мерки „долар за долар“, што дополнително ги зголемува стравувањата од поширока трговска војна меѓу двете земји.