Новороденче пронајдено мртво во дом во Англија, полицијата уапси седум лица

Седум лица се уапсени во Шефилд, Англија, под сомнение за убиство на новородено девојче, откако полицијата рано наутро интервенирала во станбен објект во населбата Винкобанк.

— реклама —

Полицијата на Јужен Јоркшир нешто пред 6 часот добила пријава за загрозено дете и веднаш упатила полициски и итни медицински екипи на адресата на улицата „Холивел Хајтс“. Во објектот било пронајдено новороденчето, но и покрај обидите за помош, девојчето било прогласено за починато на местото на настанот.

— реклама —

Главната инспекторка Ема Најт изјавила дека полицијата е свесна оти случајот ќе ја вознемири локалната јавност.

„Нашиот тим истражители и полицајци посветено работи на случајот и целосно е насочен кон обезбедување правда за девојчето“, изјавила Најт.

— реклама —

Во рамките на истрагата се уапсени седум лица, кои се сомничат за убиство. Сите се задржани во полициски притвор, а истражителите сè уште ја утврдуваат точната возраст на дел од нив.

Полицијата апелира до јавноста да не шпекулира за околностите под кои починало новороденчето, нагласувајќи дека истрагата е во рана фаза.