Обезбедени сензори за гликемија за 800 лица со дијабетес тип 1, зголемени и количините на инсулинска и антидијабетична терапија

Министерството за здравство обезбедило сензори за континуирано следење на гликемијата за 800 лица со дијабетес тип 1, а со последната јавна набавка се зголемени и количините на инсулинска и антидијабетична терапија.

— реклама —

Од Министерството информираат дека набавката, склучена во април годинава, важи до април 2028 година. Во мај и јуни биле заменети сите трансмитери согласно со протоколот, а на пациентите им биле распределени сензори за шест месеци, односно до декември 2026 година.

— реклама —

Сензорите се наменети за лица со дијабетес тип 1 до 25-годишна возраст, бремени жени, слепи лица, како и пациенти со најтешки компликации и придружни заболувања. Тие ги подигнуваат помагалата во инсулинските аптеки, согласно со утврдениот режим.

Од Министерството посочуваат дека со оваа мерка, во рамките на расположливите буџетски средства, приоритетно се опфатени најранливите категории пациенти, со цел да се овозможи континуирано следење на нивото на гликемија и подобра контрола на болеста.

— реклама —

Сензорите за континуирано следење на гликемијата за првпат биле обезбедени во 2023 година за 650 пациенти, додека со набавката во 2026 година бројот на опфатени лица е зголемен на 800.

Министерството најавува дека ќе продолжи со активностите за подобрување на грижата за лицата со дијабетес и соработката со пациентските организации.