Отворен мултидисциплинарен кабинет за дојка за побрз и поквалитетен одговор за пациентките во Клиничката болница во Штип

Подобра координација меѓу специјалистите и побрз пристап до здравствените услуги за пациентките со заболувања на дојката се очекува со отворањето на мултидисциплинарниот кабинет во Клиничката болница во Штип. Кабинетот денеска го посети министерот за здравство, Сашо Клековски, кој истакна дека ракот на дојката и натаму претставува значаен здравствен предизвик.

Клековски посочи дека речиси илјада жени годишно заболуваат од рак на дојка, поради што се неопходни поголема свесност, навремени прегледи и подобар пристап до здравствена заштита.

— реклама —

„Во месецот во кој се обидуваме да ја подигнеме свесноста за борба против ракот на дојката, еден од најчестите канцери, речиси илјада жени годишно добиваат рак на дојка и тоа претставува значаен здравствен проблем за жените и за општеството“, истакна министерот.

Тој нагласи дека посетата била посветена и на новите услуги што се воведуваат во Клиничката болница во Штип, меѓу кои се новата лабораторија и проширениот сет здравствени услуги. Најави и дека следната недела ќе бидат претставени нови услуги на одделот за неврологија.

— реклама —

Клековски посочи дека целта е на новата болничка зграда, чија изградба е планирана, постепено да ѝ се даде содржина преку развој на услугите и работата на здравствените работници.

— реклама —

„Здравството не го чинат зградите, го чинат луѓето и нивната работа“, истакна министерот.

Отворањето на мултидисциплинарниот кабинет за дојка треба да овозможи подобра координација меѓу специјалистите, со што пациентките ќе добијат побрз и поквалитетен одговор на своите здравствени потреби.

Во текот на овој месец се планирани и дополнителни 180 мамографии за време на викендите, со цел да се намалат листите на чекање и пациентките побрзо да стигнат до потребниот преглед.

Дополнително, во Клиничката болница во Штип се очекува да пристигне нов, современ мамограф, со кој треба да се унапреди квалитетот на услугите за пациентките од источниот дел на Македонија.